"Eurovision-2012” yarışmasının Rusiyadan olan iştirakçıları "Buranovskie babuşki” qrupu Moskvada keçirilməli olan baş məşqlərini təxirə salıblar. eurosmi.ru saytının verdiyi məlumata görə, bu barədə Udmurtiyadan qrupun mətbuat katibi Svetlana Sırıqina bildirib. Məşqin təxirə salınmasını isə nənələr özləri təkid ediblər. Sırıqinanın dediyinə görə, sən demə, nənələr öz təsərrüfat sahələrində kartof əkinini hələ tam başa vurmayıblarmış: "Qrupun iki üzvü əkini başa çatdırsa da, qalanları bunu etməyiblər. Onların nəvələri nənələri əmin ediblər ki, narahatlığa əsas yoxdur. Əkinin öhdəsindən gələ bilərlər. Amma nənələr ötən illərdə olduğu kimi bu işi özləri görəcəklərini bildiriblər”.

Sırıqinanın dediyinə görə, Moskvada keçiriləcək baş məşq bu səbəbdən bir neçə günlük təxirə salınıb.
Qrup üzvləri Moskvaya 8 mayda gələcəklərinə söz veriblər. Məşqlərini davam etdirəcək qrup üzvləri oradan birbaşa Bakıya uçacaqlar.

ans