Yaz-yay mövsümü ilə əlaqədar Bakıda satılan və istehsal olunan
dondurmaların və sərinləşdirici içkilərin yoxlanılmasına başlanılıb.Səhiyyə Nazirliyi Respublika Gigiyena və Epidemiologiya Mərkəzinin Qidalanma Gigiyenası Bölməsinin müdiri İmran Abdullayevin
Anspress-ə verdiyi məlumata görə, yay aylarında dondurma,
sərinləşdirici içkilərin istehsal olunduğu və satıldığı obyektlərdə
reydlər keçirilməsinə başlanılıb. Artıq 2 müəssisə müayinə olunub, orada
istehsal olunan məhsulların çeşidləri müəyyənləşdirilib və onların
serifikatlaşdırılması prosesinə başlanılıb. Hələlik həmin müəssisələrdə
problem aşkarlanmayıb.
"Digər müəssisələrdə də yoxlamalar
aparılacaq. Hansısa müəssisədə neqativ hallar aşkarlanarsa. Təbii ki,
həmin istehsalçıların məhsullarına sertifikatlar verilməyəcək. Dondurma
məhsulu istehsal olunarkən istifadə olunan xammalların təhlükəsizliyi,
istehsal zamanı kənar çirklənmələrin qarşısının alınmasıdır.
Dondurmaların mikrobioloji göstəriciləri, toksikoloji göstəriciləri və
s. tərkibi yoxlanılacaq”, - deyə İmran Abdullayev bildirdi.
İqtisadi İnkişaf Nazirliyinin mətbuat xidmətinin rəhbəri Abbas Əliyev bildirib
ki, artıq nazirlik tərəfindən də sərinləşdirici içkilər və
dondurmaların monitorinqinə başlanılıb. İqtisadi İnkişaf Nazirliyi
yanında Antiinhisar Siyasəti və İstehlakçıların Hüquqlarının Müdafiəsi
Dövlət Xidməti tərəfindən yay fəsli bitənə qədər yoxlamalar davam
edəcək. Abbas Əliyevin sözlərinə görə, hələlik yoxlamalar zamanı neqativ
hala rast gəlinməyib.
Lakin Dövlət Xidməti yenə də vətəndaşlara
dondurma alarkən diqqətli olmağı tövsiyyə edir. İstehlakçılar dondurma
alarkən mütləq etiket üzərində yazılanları diqqətlə oxumalıdırlar. Eyni
zamanda, dondurma alarkən onun forması, saxlanma şəraitinə və nəhayət
dadına diqqət edilməlidir. Donu açılmış dondurmanın təkrar dondurulması
onda buz kristlların əmələ gəlməsinə səbəb olur ki, bu da onun
keyfiyyətinin aşağı düşməsinə gətirib çxıarır. Xarici görünüşcə
dondurmada kəsmiyə bənzər yağlılıq, quma bənzər köpüklülük əlamətləri
olmamalıdır. Belə dondurmaları istifadə etmək məsləhət görülmür.
Dondurmanın
iyi və dadı bu növ məhsula xas olmalı, kənar iy və dad verməməlidir.
İstehsal tarixi qeyd olunmayan və saxlama müddəti ötmüş dondurmaları
almaq məsləhət görülmür.
