Honq Konqdakı hərracda dünyada ən iri çəhrayı brilyantlardan biri
satılıb. Trend-in Rusiya KİV-ə istinadən verdiyi məlumata görə, onu
anonim alıcı 17,4 milyon dollara alıb.
"Mars çəhrayısı" adlanan brilyantın çəkisi 12 karata yaxındır.
Amerikalı zərgər Ronald Uinston bu adı ona 1976-cı ildə NASA-nın Marsa
peyk göndərməsini qeyd etmək üçün verib.
"Christie's" hərrac evinin nümayəndəsinin sözlərinə görə, bu daş nə vaxtsa satışa çıxarılan çəhrayı brilyantlardan ən irisidir.
Brilyantın qiymətinin müəyyən edilməsi üçün hərrac qızğın keçsə də,
cəmisi altı dəqiqə davam edib. Sonda telefonla qoyuluş etmiş anonim
alıcı qalib gəlib.
Ölçüsünə görə "Mars çəhrayısı" ilə müqayisə oluna biləcək yeganə
çəhrayı brilyant "Uilyams çəhrayısı" adlı daşdır. Onun çəkisi 23,6
karata çatır və Britaniya kraliçası II Yelizavetaya məxsusdur.
Lakin "Uilyams çəhrayısı" heç vaxt satışa çıxarılmayıb. Onu
Tanzaniyada almaz axtarışları zamanı tapıblar və o zaman hələ şahzadə
olan Yelizavetaya bağışlayıblar. Almaz 1947-ci ildə Yelizavetanın
şahzadə Filiplə toyuna hədiyyə olunub. Daha sonra ondan bəzək sancağı
hazırlanıb.