Ermənistan Bakıda keçiriləcək "Eurovision"da iştirakdan imtina etdiyinə görə cəzalandırılıb
Avropa
Yayım Birliyi (AYB) Ermənistanı bu ayın sonunda Bakıda keçiriləcək
"Eurovision" mahnı müsabiqəsində iştirakdan imtina etdiyinə görə
cəzalandırıb. Trend-in məlumatına görə, bu barədə çərşənbə günü
İTAR-TASS agentliyinə qurumun Cenevrədə yerləşən KİV-lə iş şöbəsinin
rəhbəri Annika Niberq-Frankenxauzer bildirib.
Onun sözlərinə görə, bu qərar AYB Televiziya komitəsi və referent qrupu tərəfindən işin öyrənilməsindən sonra verilib.
Qərara görə, Ermənistan müsabiqədə iştirak üçün nəzərdə tutulan
məbləği, həmçinin cərimə kimi həmin məbləğin 50 faizini ödəməlidir.
Bundan başqa, Ermənistan İctimai Televiziyası müsabiqənin finalını
"əvvəldən axıra və fasiləsiz" yayımlamalıdır, əks halda ölkə 2013-cü
ildə AYB tərəfindən keçiriləcək "Eurovision" yarışmasında iştirak
hüququndan məhrum ediləcək.
Niberq-Frankenxauzer bildirib ki, qərar qəbul edilərkən Ermənistanın
Bakıya müğənni göndərməməsi üçün gətirdiyi səbəblər nəzərə alınmayıb.
"Reqlament mövcuddur və müəyyən müddətdən sonra iştirakdan imtina edən
ölkə öz qərarını dəyişə bilməz", - o deyib və qeyd edib ki, Ermənistan
son tarix keçəndən sonra öz iştirakından imtina barədə məlumat verib.
Fevralın 24-də bir qrup erməni estrada müğənnisi "Eurovision"
müsabiqəsində iştirakdan imtina etdiklərini bəyan ediblər. AYB baş
direktoru İnqtid Deltonre bu gün keçirilən mətbuat konfransında bildirib
ki, Ermənistanın bu addımı Birliyin qaydalarına uyğun gəlmir.
