Tələbə Qəbulu üzrə Dövlət Komissiyası ali və orta ixtisas təhsili
müəssisələrinə sənəd verən abituriyentlərin hərbi çağırışdan möhlət
alınmasına dair məsələlərlə bağlı müraciətlərinə aydınlıq gətirib.
Komissiyasının mətbuat xidmətindən bazar ertəsi Trend-ə verilən
məlumata görə, 2012/2013-cü tədris ili üçün respublikanın ali təhsil
müəssisələrinin bakalavriat səviyyəsinə və tam orta təhsil bazasında
orta ixtisas məktəblərinə ərizə qəbulunun gedişində vətəndaşlar
tərəfindən hərbi çağırışdan möhlət alınmasına dair TQDK-ya çoxsaylı
müraciətlər edilir.
TQDK bununla əlaqədar olaraq bildirir ki, Azərbaycanda hərbi
çağırışla bağlı bütün məsələlər Azərbaycan Respublikasının Səfərbərlik
və Hərbi Xidmətə Çağırış üzrə Dövlət Xidmətinin səlahiyyətlərinə
daxildir.
Qəbul qaydalarına əsasən, ümumtəhsil müəssisələrini əvvəlki illərdə
bitirmiş 18 yaşı tamam olan (1994 cü il iyulun 30-na qədər anadan
olmuş), 35 yaşınadək olan çağırışçıların ali və orta ixtisas təhsil
müəssisələrinə sənəd vermək üçün möhlət haqqında arayış və hərbi
sənədlərində bu barədə Səfərbərlik və Hərbi Xidmətə Çağrış üzrə Dövlət
Xidmətinin qeydiyyatı olmalıdır. Hərbi qeydiyyatın aparılması Dövlət
Xidməti tərəfindən təsdiq edilən qaydalarla tənzimlənir.